Хуш киләсең, ямьле көз!

Зал бәйрәмчә бизәлә. Өстәлгә көзге уңыш: җиләк-җимеш, яшелчә, башаклар куела. Салмак көй яңгырый, балалар залга керәләр.

Алып баручы: Көз көннәре килеп җитте,

Хушлашабыз җәй белән.

Бөтен җиргә яфраклардан

Алтын келәм җәелгән.

Кадерле балалар, тәрбиячеләр, бакчабыз җитәкчеләре. Бүген без халкыбызның иң гүзәл бәйрәмнәреннән берсе – «Сөмбелә» бәйрәменә җыелдык. «Сөмбелә»- көзге бәйрәм уңыш бәйрәме.

Балалар шигырь сөйлиләр.

Җыр «Яфрак бәйрәме».

(Балалар урындыкларга утыралар.)

Алып баручы: Безнең бакча балалары

Яшелчәләр үстерә.

Бакчадагы туптан да зур,

Мәсәлән, ул бу нәрсә?

Шалкан күрсәтә.

( 1 нче төркем балалары «Шалкан» әкиятен сәхнәләштерә.)

Алып баручы: Ә хәзер, 2 нче төркем балалары башкаруында җыр. «Көзге моң».

Алып баручы: Балалар, карыгыз әле, җирдә нидер ята? Хат түгелме бу?

Балалар: Телеграмма.

Алып баручы: Әйдәгез, ачып укыйк әле.

(Ачып укыйлар.)

Әйдәгез, бергәләшеп кул чабыйк. Бәлки, чынлап та Сөмбелә үзе дә килеп җитәр.

(Көй яңгырый. Сөмбелә керә.)

Сөмбелә:

Исәнмесез, нәни дусларым!

Мин – Сөмбелә, килдем сезгә.

Көзге байлык кулымда.

Муллык белән байлык телим

Кем очраса юлымда.

Алып баручы:

Син килүгә сөендек,

Бик күп җырлар өйрәндек,

Шигырь, табышмак, мәкальләр,

Күп биюләр өйрәндек.

Сөмбелә: Дусларым, күрәм, сез бик уңганнар икәнсез. Минем дә сезгә бүләгем бар. Быел уңыш бигрәк мул булды! Ул кишер, помидор, чөгендер! Бүген мин аларны үзем белән дә алып килдем.

Килегез әле, яныма. ( 9 нчы төркем балалары «Бар матур бакча» дип исемләнгән җырлы-биюле уен башкаралар.)

Сөмбелә: Булдырдыгыз, балалар. Рәхмәт сезгә. Яшелчәләрне җыеп бетердек, хәзер бераз ял итеп алсак та була. Мин сезгә табышмаклар әйтәм, ә сез җавапларын табыгыз.

( табышмаклар әйтә.)

Сөмбелә: Бик дөрес, дусларым. Зирәклегегез мине сокландырды. Әйдәгез хәзер, бер күңелле уен да уйнап алыйк.

(Яшелчәләр уены.)

Ишектән игенче белән ипи тоткан бала керә.

Игенче:

Көзнең иң олы бүләге

Икмәк тора табында.

Тормышыбыз ямьле булыр,

Икмәк булган чагында.

Бала:

Яшәү чыганагы- кояш нурын,

Җир җылысын саклап үзендә.

Күкрәкләргә терәп кисәр икмәк

Һәр табынның тора түрендә.

(Икмәкне тапшыра.)

Җыр: «Чайкала иген кырлары».

Игенче, бала, чыгып китәләр.

Алып баручы:

Һәр көз үзенчә килә ул,

Һәр көз үзенчә матур.

Елмаешып бер биесәк,

Көзне ярату булыр.

«Елмаю» биюе.

Алып баручы:

Шатлык булып бүлмәбезне

Гөлгә күмә Сөмбелә.

Саубуллашу җырына

Син дә кушыл Сөмбелә.

Җыр «Сөмбелә». Балаларга күчтәнәч калдыра. Сөмбелә залдан чыгып китә.

Алып баручы: Бәйрәмебез тәмам сау булыгыз.